Šula za delnjoserbsku rěč a kulturu 25. róčnicu wobstaća swjećiła

Choćebuz (SN/MiR). 25 lět na dobro Delnich Serbow skutkować, jich sebjewědomje skrućić, k wožiwjenju a zachowanju rěče přinošować, to běchu a su nadawki, kotrež sej Choćebuska Šula za delnjoserbsku rěč a kulturu staja a spjelnja. Wjace hač 200 hosći dožiwi minjeny pjatk popołdnju w Choćebuskim měšćanskim domje, kak su rěčnicy, kotřiž wšitcy tež serbsce strowjachu, skutkowanje kubłanišća wysoce hódnoćili. Nětčiša nawodnica Uta Henšelowa přija wutrobne gratulacije, zwjazane z mnohimi darami. Na čole zarjadnišća, kotrež bu na jeje iniciatiwu 1992 załožene, steješe nimale 25 lět Marja Elikowska-Winklerowa. Mjeztym na wuměnku angažuje so wona přiwšěm dale na dobro „swojich“ Serbow. Hakle njedawno bě zaso na wsach po puću a šěrješe jako „pójsynoga“ wědu wo něhdyšim a dźensnišim wjesnym žiwjenju w Delnjej Łužicy. Tuž bě prawje, ju tón dźeń wosebje počesćić. Wyši měšćanosta Holger Kelch (CDU) přitomnych serbsce witaše a prošeše Winklerowu, do čestneje chroniki města so zapisać.