Serbska rěčna šula dóstawa po prěnich nazhonjenjach jasniši raz
Budyšin (SN/MiR). Wothłosowany abo schwaleny koncept za Serbsku rěčnu šulu zjawnosći dotal njepředleži. Přiwšěm wšelake gremije na tajkim dźěłaja. Do nich słuša skupina politikarjow a zastojnikow na runinje sakskeho knježerstwa, kotrymž su poboku Budyski Serbski institut, Rěčny centrum WITAJ a Serbske šulske towarstwo. „Prěnjorjadny zaměr projekta je, zo so Serbska rěčna šula institucionalizuje“, rozłožuje zapósłanc Sakskeho krajneho sejma Marko Šiman (CDU), kiž projekt doprědka ćěri, „přirjadować wuwučowanje zajimcow někajkej ludowej uniwersiće, njedosaha.“
