Nawuknjenje serbšćiny podpěrać je dale a trěbnišo
Choćebuz (SN/MiR). Wulka zjawna akceptanca modeloweho projekta Witaj jewješe so wčera w Choćebuskim měšćanskim domje. Tam wotmě so swjedźenske zarjadowanje k 20. róčnicy załoženja projekta. Přeprosyło bě Serbske šulske towarstwo, kotrež je nošer třoch serbskich a štyrjoch Witaj-pěstowarnjow. Předsydka SŠT Ludmila Budarjowa witaše tajku syłu hosći, zo njezby na žurli ani jeničkeho městna. Mjez přitomnymi běchu předsyda Domowiny Dawid Statnik a jeho zastupjer Marcus Kóńcaŕ, předsyda Rady za serbske naležnosće Braniborskeje Torsten Mak, naměstnicy direktora Załožby za serbski lud Michaela Mošowa a Sabina Siegowa kaž tež mnozy nawodźa serbskich institucijow a zastupjerjo němskeho a serbskeho zjawneho žiwjenja. Wosebje witane běchu kubłarki/kubłarjo a dźěći ze wšitkich w nošerstwje SŠT skutkowacych kubłanišćow.