Rady bychu wobdźělnicy dlěje w sprjewinym měsće přebywali

Budyšin (SN/MiR). Najwažniši posudk wobdźělnikow lětušeje, mjeztym 3. sakskeje Slawiniady bě, zo bychu rady hišće dlěje na zetkanju w Budyšinje přebywali. Šulerjo mějachu přemało chwile za mjezsobne zeznaće kaž tež za zeznajomjenje ze sprjewinym městom.

W Sakskej móža sej zajimowani šulerjo w cuzorěčnej wučbje štyri słowjanske rěče přiswojić – čěšćinu, pólšćinu, serbšćinu a rušćinu. Poskitk wobsteji po cyłym zwjazkowym kraju, a to we wšěch šulskich schodźenkach, wot zakładneje šule hač na gymnazij. Zańdźeny pjatk a sobotu je so 40 młodostnych 9. lětnika w Budyskej młodowni w Garbarskej bašće k šulerskemu seminarej pod hesłom Slawiniada zetkało, zo bychu swoje dokonjanosće při nałožowanju znajomosćow w tychle rěčach dopokazali.