W prawopisu a gramatice zwučować

Budyšin (SN/MiR). Internetna wučbnica „Serbsce DIGITALNJE krok po kroku wu­knyć – prawopis a gramatiku“ je hotowa. Sobudźěłaćerjo Rěčneho centruma WITAJ, předewšěm projektowej koordinatorce Jadwiga Dyrlichowa a Julija Jankowscyna, su z mnohimi partnerami, mjez druhim ze Załožbu za serbski lud, Serbskim institutom a agenturu za młode me­dije KIDS interactive, dlěje hač dwě lěće­ na njej dźěłali. Předchadźaca knježerstwowa koalicija CDU a SPD w Sakskej bě dojednała, zo ma so digitalny srědk za nawuknjenje serbšćiny a wukmanjenje w rěči wuwiwać. Wobstajnje su temu po tym mjez druhim we wodźenskej skupinje pola kultusa dale wobjednawali.