Lipsk (LW/SN). Skupina šulerjow z Delnjeje Łužicy je so wobdźěliła na studijnym informaciskim dnju na Lipšćanskej uniwersiće. Zańdźenu sobotu přebywachu młodostni z přewodom Katarzyny Fidekoweje a Marion Stenseloweje na tamnišim Instituće za sorabistiku. Wšitcy šulerjo skutkuja při RBB w młodźinskim wusyłanju „Bubak“ sobu. Jich wizita bě wotmołwa na wopyt Lipšćanskich studentow w juniju 2017 we Hochozy, hdźež bě ideja wuměny nastała. Šulerjo wobhladachu sej uniwersitu a wobdźělichu so na přednoškomaj. Něhdyši stipendiat Załožby za serbski lud Aleksandar Jovanović ze Serbiskeje je wopytowarjow po Lipsku wjedł.
Nimo šulerjow běchu sej do Lipska dalši zajimcy za studij sorabistiki dojěli. Doktorandaj instituta Till Wojto a Liza Waltherowa předstajištaj přehlad dźěławosće instituta na akademiskim, didaktiskim a socialnym polu. Wědomostna sobudźěłaćerka a docentka dr. Jana Šołćina je zajimcam podała konkretne informacije wo studiju a je jich poradźowała.