Kubłarki sčasom zwěsćeja, hdźe maja dźěći brachi
Pančicy-Kukow (SN/MiR). Sakske socialne ministerstwo bě zwěsćiło, zo maja mjez šulerjemi 1. lětnika mnozy njedostatki rěčenja, koordinacije, ale tež wahi ćěła. Ani kóžde pjate dźěćo njespjelnja poručene kriterije starobje wotpowědowaceho wuwića.
Zakład zwěsćenja su lětuše přepytowanja šulskich nowačkow. Socialna ministerka Barbara Klepsch (CDU) staršich tuž namołwja, sej wjace chwile za swoje dźěći brać. Swobodny stat Sakska chce rěčne wuwiće dźěći w dnjowych přebywanišćach přichodnje bóle spěchować. Kubłarki tam dźě najlěpje zwěsćeja, hdźe maja jich chowancy brachi a njedostatki wosebje tež rěčneho razu.
Budyska logopedka Wanda Wokowa ma postupowanje za trěbne. „Hižo w předšulskej starobje starši pytnu, hač maja jich dźěći rěčny deficit. Tuž je druhdy lěpje dźěćo lěto dlěje do pěstowarnje dać. Hólcow to bóle potrjechi hač holcy.“