Wučerjo z dwurěčneho ruma Sakskeje měli próstwu stajić
Budyšin (SN/MiR). Wuhotować powołanske wopisma za zastojnistwa w serbskej rěči njeje po płaćiwym prawje nažel móžno. To zdźěli referent w nawodnistwje Budyskeje regionalneje wotnožki Sakskeho krajneho zarjada za šulu a kubłanje (LaSuB) dr. Jens Drummer na naprašowanje Serbskich Nowin. Mjeztym pak je so wustajiło, zo je móžno wopisma za wučerjow, kotřiž chcedźa so ze zastojnikom stać, tež serbskorěčnje wuhotować. Wobkrućił je to sakski statny minister za kultus Christian Piwarz (CDU) zańdźeny štwórtk na wopyće Worklečanskeje Serbskeje wyšeje šule „Michał Hórnik“. „Mamy situaciju, zo matej hamtska přisaha a wopismo w němskej rěči być, dokelž je němčina hamtska rěč. Sym pak nadawk dał w našim domje pruwować, hač je móžno tym, kotřiž sej to přeja, wotpowědne wopismo hišće raz w serbšćinje wupisać, zo bychmy přisłušnosć k ludej wobkedźbowali. Hdyž sej to něchtó přeje, potom my to zmóžnimy.“