Domowina podpěruje ludowe požadanje wo dlěše zhromadne wuknjenje

Budyšin (CS/SN). Dlěje zhromadnje wuknyć ma tójšto lěpšin. Toho běchu sej wobdźělnicy wčerawšeho foruma w Budyskim Serbskim domje na temu „zhromadna šula“ přezjedni. Pozitiwne nazhonjenja w naležnosći su mjez druhim na kubłanišću w Husce (Gaußig) zběrali, kotrež drje po mjenje žana zhromadna šula njeje, ale de facto tak funguje. Šula je mjez zajimcami njesměrnje požadana.

Facit wčerawšeho wječora je, zo dobre a přeswědčiwe pedagogiske koncepty wo tym rozsudźeja, kelko staršich swoje dźěći­ na kubłanišću přizjewi. To drje jeno za němske šule płaći. Kaž mjenujcy někotři wobdźělnicy diskusije zwuraznichu, móhło to mjez serbskimi kubłanišćemi ke kanibalizmej wjesć, maja-li so wone wo wobmjezowanu ličbu serbskich šulerjow wadźić. Stejnišća móhli tak wosłabić, a zachowanje serbskeje rěče bychu tuž na hrački stajeli.