Za žiwu serbšćinu w dwurěčnym rumje a zwonka njeho
Budyšin (SN/MiR). Serbska rěčna šula w Budyšinje je nětko oficialnje wotewrjena. Sakski statny minister za kultus Christian Piwarz (CDU) přepoda wčera nawodźe Budyskeje wotnožki Sakskeho zarjada za šulu a kubłanje (LaSuB) Mathiasej Peterej w rumnosćach zarjada taflu z napisom w němskej a serbskej rěči. Peter, kiž bě wulku ličbu přitomnych serbsce powitał, přilubi taflu wonka na domje připrawić. Sakske statne ministerstwo za kultus přewostaja šuli za prěnjej lěće wjace hač 330 000 eurow. Přirjadowane je kubłanišćo zarjadej LaSuB.
