Budyšin (SN/MiR). Za něšto mjenje hač štyri tydźenje započnje so w Sakskej zymski studijny semester. Mjez nowymi studentami za wučerstwo budźetej nadźijomnje tež lětušej maturantce Serbskeho gymnazija Budyšin. Za studij tak mjenowaneho „jadroweho“ předmjeta serbšćina na wyšich šulach běštej wonej hnydom připrajenje dóstałoj, njedosahaceho numerusa claususa pak nic za zakładnošulsku didaktiku serbšćina. Wužiwałoj stej tuž prawo za serbskich respektiwnje serbšćinu rěčacych požadarjow, přerězk matury wo 1,0 zwyšić. Tež to pak zmóžni jimaj jeničce městno na čakanskej lisćinje. Wuspěšna Witaj-šulerka móže­ po interwencijach ze wšelakich stron studij na Instituće za sorabistiku Lipšćanskeje uniwersity zahajić. Poža­darka z maćernorěčnym pozadkom porno­ tomu dale čaka, zo bychu jej studij na Drježdźanskej Techniskej uniwersiće při­zwolili.