Wjac hač 28 dźěći do jedneje rjadownje na žadyn pad njepřiwozmu
Budyšin (SN/JaW). Přizjewić swoje dźěći za 5. lětnik na dale wjeducym kubłanišću staršich kóžde lěto wužaduje a před nowe ćeže a prašenja staja. To zwěsćeja přiběrajcy tež sobudźěłaćerjo Budyskeje wotnožki Krajneho zarjada za šulu a kubłanje (LASuB).
Kaž zdźěli nowinski rěčnik regionalneho stejnišća LASuB dr. Jens Drummer, maja starši swoje dźěći po zarjadniskim předpisu najpozdźišo hač do 28. februara za 5. lětnik na jednej z wyšich šulow abo gymnazijow přizjewić. „7. februara dóstanu dźěći na zakładnych šulach kubłanske poručenje, potom je tři tydźenje chwile je přizjewić“, dr. Drummer wuswětli. Serbske šule přiwozmu prěnjorjadnje dźěći, kotrež serbsku rěč wobknježa.