Rěčny centrum WITAJ dale wo serbšćinarjow wabi

Budyšin/Kulow (SN/MiR). Rěčny centrum WITAJ je wudał brošuru, w kotrejž předstaja móžnosće serbskorěčneho kubłanja w Kulowje a jeho wokolinje. Zešiwk předleži serbsce „W Kulowje a wokolinje: Wotmała serbsce wuknyć“ a němsce „In Wittichenau und Umgebung: Von klein auf Sorbisch lernen“. Awtorka, wědomostna sobudźěłaćerka RCW Jadwiga Kaulfürstowa, wujasnja: „W žanym druhim regionje njeje telko rozdźělnych poskitkow serbskorěčneho kubłanja w pěstowarnjach a šulach kaž w kónčinje mjez Ralbicami a Wojerecami. Starši maja móžnosće na wuběr, wot nimale ryzy serbskeho kubłanja hač k tajkemu, hdźež nawuknu dźěći zakładne słowa a wobroty. W brošurce su rozdźěle mjez tamnišimi 16 kubłanišćemi dokładnišo wopisowane.“ Tak předstajeja čitarjam modele, po kotrychž dźěći serbsku rěč wuknu: „Witaj“ w pěstowarni a šulske koncepty 2plus, serbšćina jako cuza rěč a serbšćina we wólbnym wobłuku. K tomu wopisujemy, kak a pod kotrymi wuměnjenjemi modele w konkretnych kubłanišćach zwoprawdźeja.