Drježdźany (SN/MiR). Sakske knježerstwo je wčera wobzamknyło, zo smědźa dźěćace dnjowe přebywanišća a šule zaso dźěłać kaž w času do pandemije. Wuměnjenje je, zo wobsteji stabilna sydomdnjowska incidenca pod połsta. To předwidźi nowe škitne rjadowanje wo koronje, kotrež bě krajne knježerstwo srjedu wobzamknyło. Rjadowanje ma wot přichodneje póndźele, 31. meje, płaćić. Trěbna je zakładna hódnota (Schwellenwert) pod połsta po pjeć na so slědowacych dźěłowych dnjach we wotpowědnym wokrjesu. Potom płaći prawidłowne dźěło wot zapřichodneho dnja. Kaž Budyski krajnoradny zarjad zdźěli, budźe to w Budyskim wokrjesu najzašo wot 2. junija móžno.