Na zwjazkowym wubědźowanju „Młodźina hudźi“ wuspěch žnjeli
Budyšin/Wojerecy (SN/MiR). Lětuše cyłozwjazkowe 58. wubědźowanje „Młodźina hudźi“ měješe wjacorych mytowanych z Budyskeje a Wojerowskeje hudźbneje šule. „Lětsa njebě scyła tak jednore so na wubědźowanju wobdźělić“, zwurazni jednaćelka towarstwa „Młodźina hudźi“ Sakska/Łužica Christiane Vogel. „Wšako njemějachmy kaž po zwučenym wašnju jednotliwe regionalne a krajne wubědźowanje. Zarjadowani stej so zhromadnje wotměłoj.“
Młodźi hudźbnicy pak njejsu swoje wukony prezencnje dokumentowali, ale mějachu je na widejo natočić, a to za wšitke tři schodźenki, wotpowědnje delegowanju. „Mnozy šulerjo, kotřiž chcychu na regionalnym wubědźowanju pódla być, njejsu so na kóncu přizjewili“, rjekny zamołwita za zarjadnistwo Wojerowskeje hudźbneje šule Nicole Koniarski. „Woni njemóžachu pandemije dla z wučerjom abo hudźbnym partnerom zwučować.“