Kubłanska konferenca wo perspektiwje města w strukturnej změnje
Wojerecy (SN/MiR). Wojerecy su w swojich stawiznach nazhonili wjackróć wulke změny. Z něhdy přewažnje wot Serbow wobydleneho, skerje ratarskeho městačka je so wuwiło moderne město, w kotrymž bydlachu ludźo ze wšěch kóncow něhdyšeje NDR. Dźěłachu w brunicownjach Łužiskeho rewěra, w milinarnjach a briketownjach. Dokelž so ličba dźěłowych městnow po politiskim přewróće masiwnje pomjeńšowaše su mnozy Wojerecy zaso wopušćili. Nětko maja naprawy w srjedźišću stać, kotrež dalšemu wotpućowanju z města zdźěwaja a nowych a něhdyšich wobydlerjow přiwabja. Pomhać maja při tym dobre wuměnjenja za kubłanje w měsće nad Čornym Halštrowom. To podšmórnychu wjacori rěčnicy na wčerawšej kubłanskej konferency pod hesłom „Motor za změnu a rozrost“ we Wojerowskej Łužiskej hali. Měšćanosta za kubłanje Mirko Pink rjekny konferencu zahajejo: „Z młodymi ludźimi započina so přichod“. Z tutymi słowami bě wón zarjadowanju směrnicu dał a z tym tež wuwiću města w strukturnej změnje.