Z fachowymi dopokazami njeje ćežko wučerjow z Ukrainy přistajić

Budyšin (SN/MiR). Krok po kroku dochadźeja do šulskich rjadownjow na sakskich šulach dźěći a młodostni, kotřiž su z Ukrainy. Šule su sakskemu krajnemu zarjadej za šulu a kubłanje (LaSuB) po­srědkowali swobodne kapacity. Dźeń a wjace kubłanišćow nětko šulerjow, kotřiž su do Němskeje ćěkali, witaja. Při tym maja něhdźe 1 400 šulow w zjawnym kaž te w swobodnym nošerstwje zmištrować po dwěmaj lětomaj korony wulke wužadanja. „Aktualna situacija, kotraž přez konflikt mjez Ruskej a Ukrainu nastanje, žada sej pak rozestajenje“, tak rěčnik LaSuB Roman Schulz, „to zasłuži sej najwjetši respekt, tež zamołwitym w našim zarjedźe napřećo.“

Zasadźenje wučerjow z Ukrainy w Sakskej, kotřiž su ze swojeje domizny ćěkali a nětko wuwučuja, wotwisuje wot toho, w kotrej měrje je integracija dźěći postupowała, hač wone w regularnych rjadownjach wuknu abo w rjadownjach za wukrajnikow, w kotrychž jim němčinu po­srědkuja (DaZ). K tomu słušeja dale přihotowanske rjadownje za wukrajnikow (VKA) kaž tež tajke za ukrainskich šulerjow (VKU).