Lětuši nabožny tydźeń dźěći zaběra so z tym, što nas wšědnje wobdawa

Róžant (SN/MiR). W nimale wšitkich katolskich wosadach nowych zwjazkowych krajow a zdźěla tež starych wobdźěla so dźěći tele dny na nabožnym tydźenju (RKW). Wosebity wjeršk dožiwichu wobdźělnicy z Drježdźansko-Mišnjanskeho biskopstwa srjedu w Róžeńće. Na putniskej łuce swjećachu hólcy a holcy zhromadnje z biskopom Heinrichom Tim- mereversom kemše. Šěsć ministrantow z Wotrowskeje wosady běše biskopej po boku. Dwě dźěsći přednjeseštej próstwje w serbskej rěči. Na te wašnje bě serbšćina wšitkim přitomnym bliska. Přewažnje wužiwana rěč pak bě němčina.