Kóždy šesty šuler to hižo raz dožiwił, pandemije dla je prewencija wobćežna

Berlin (dpa/SN). Ani w swójskej dźěćacej stwě njejsu wěsći: Potrjecheni cybermobbinga njemóža stajnym křiwdźenjam a hanjenjam wućeknyć. „Mam poprawom mobbing cyły čas w zaku při sebi“, rozjasni Hendrikje Schmidt z krizoweho četa (Krisenchat), kotryž zaběra so z psychosocialnym poradźowanjom dźěći a młodostnych, tele dny w Berlinje nastupajo šmóratko. To drje wjedźe k tomu, zo čuja so mnozy młodostni bjezpomocni a bjezradni. „Njeje žanoho kónca, a ja njemóžu to zběhnyć a tež nic zastajić.“

Po wuslědku minjenu srjedu wozjewjeneho naprašowanja Zwjazka přećiwo cybermobbingej w kooperaciji z chorobnej kasu technikarjow (TK) běše hižo kóždy šesty šuler (16,7 procentow) jónu wot cybermobbinga potrjecheny. To wotpowěduje wjace hač 1,8 milionam wuknjacym mjez sydom a 20 lětami. Podźěl po­trjechenych běše drje wot poslednjeho naprašowanja 2020 snadnje wo 0,6 procentow woteběrał, zwostanje pak na wysokim niwowje.