Serbske kubłanske koło so na praktiske kročele hotuje

Budyšin (SN/mb). Wutworjenje „zwjazka serbskich šulow“ je hłowna zhromadźizna Domowiny hižo 2019 w Chrósćicach jako zaměr wobzamknyła a 2021 w Slepom wobkrućiła. Iniciator namjeta běše dwójce Jan Nuk. Nětko budźe so serbske kubłanske koło z prěnimi praktiskimi kročelemi zaběrać.

Tute koło je nowa kubłanska referentka Domowiny, Katrin Suchec-Dźisławkowa, w lěće 2021 załožiła. Do njeho słušeja mjez druhim předsydka Serbskeho šulskeho towarstwa (SŠT), Katharina Jurkowa, čłonka předsydstwa SŠT Diana Wowčerjowa, kotraž je zdobom direktorka serbskeje wyšeje šule w Radworju a županka župy „Michał Hórnik“ Kamjenc, Beata Brězanowa jako nawodnica Rěčneho centruma Witaj a koordinator za serbske naležnosće w Budyskej wotnožce Krajneho zarjada za šulu a kubłanje, Bosćij Handrik.