Lětuši serbscy maturanća su pjenjezy na mnohich akcijach nahromadźili
Budyšin (SN/MiR). Lětuši maturanća Budyskeho Serbskeho gymnazija chcedźa sej wuhotować wosebity maturitny bal. Tón wotměje so 1. julija w Chróšćanskej „Jednoće“. Šulerjo-dwanatkarjo su so w štyrjoch tutorskich skupinach na předabituru a abiturne pruwowanja přihotowali. Mjeztym su woni pruwowanja zmištrowali. Při wšěm mějachu swjatočnosć z přepodaćom maturitnych wuswědčenjow a na to slědowacy swjedźeń w fokusu. Zo by so tón stał njezapomnite dožiwjenje, su zběrali ze wšelkimi akcijemi pjenjezy. Hana Šmitec, Halina Hejduškec a Sarah Hančikec su team, kotryž so wo někotre akcije stara. „Loni w nazymje smy wšitcy šulerjo zhromadnje wo tym rěčeli, štó kotry nadawk přewozmje“, Halina powěda, „składnosć k tomu běše naš prěni pućowanski dźeń při spjatym jězorje.“ Prěnje pjenjezy su woni potom na swjedźenju k 70ćinam gymnazija loni nazymu z předawanjom cocktailow, dalše na kermušce 12tkow a na póstničce lětsa 10. februara zběrali. Wosebita překwapjenka běše, zo su so na Budyskich hodownych wikach wobdźělili.
