Kultusowy minister Piwarz z wuhladom na nowe šulske lěto w Sakskej

Drježdźany (SN/pdź). K zazběhej do noweho šulskeho lěta informowaše sakski kultusowy minister Christian Piwarz wčera wo situaciji tudyšich šulow kaž tež wo aktualnych wuwićach w kubłanskim sektorje. Zo so tam tójšto hiba, wón doraznje wuzběhny: „Smy hižo kónc zašłeho šulskeho lěta započeli z přiběracym zasadźowanjom digitalnych poskitkow k spěchowanju awtonomneho wuknjenja. Lětsa chcemy to dale a bóle činić.“ Jedna so při tym wo internetnu platformu, kotruž ma předewšěm Radebeulski wotrjad krajneho hamta za šulu a kubłanje (LaSuB) w horšći. Platforma staji so šulam a šulerjam jako wudospołnjacy srědk prezencneje wučby k dispoziciji. Hač dotal wopřija 63 hotowych modulow za 16 předmjetow, wot hudźby hač k matematice. Kóždy modul sposrědkuje wědu něhdźe štyri do šěsć šulskich hodźin a měri so na šulerjow třećeho do třinateho lětnika. Wone su poměrnje po-dobnje natwarjene: Na spočatku widźiš filmčk, w kotrymž rozkładźe widejowy wučer resp. wučerka tematiku. Po tym sćěhuje přepruwowanje wědy.