Slědźerjo z Choćebuza zběraja zwuki a zynki Łužicy – tež na Bože ćěło

Choćebuz/Njebjelčicy (SN/MiR). „Naš zaměr je zwuki a zynki Łužicy zběrać a je tak zwobraznić, zo móže je kóždy a kóžda dožiwić.“ Tak zwuraznja Adrian Dorschner, architekt a hóstny docent, njewšědny intermedialny slědźerski studijo „New Lusatia/Nowa Łužyca“ na architekturnej fakulće Braniborskeje techniskeje uniwersity (BTU) Choćebuz-Zły Komorow. Zaměr projekta je mjez druhim, jónkrótne rumnostne a architektonisce historiske kwality Łužicy z nowym widom wuslědźić. Projekt njeměri so jeničce na studentow architektury, ale na studowacych, kotřiž so za temu zajimuja. Dalša ideja je, změny we wjesnych strukturach analyzować: „Při tym dźe hłownje wo wsy, kotrež su w zašłym lětstotku wudobywanja brunicy dla hinaše wjesne struktury dóstali abo kotrež su z demografiskeje změny charakterizowane“, Dorschner zwuraznja.