Radwor (SN/BŠe). Nadal wojuja starši 3. lětnika serbskeje rjadownje Radworskeje zakładneje šule wo wobstaće cyłka. Na kubłanišću je po rozsudźe Krajneho zarjada za šulu a kubłanje (LaSuB) předwidźane, šěsć serbskich šulerjow dotalneje serbskeje rjadownje třećeho lětnika z 19 němskimi dźěćimi do jedneje rjadownje noweho štwórteho lětnika zjednoćić (SN wospjet rozprawjachu.) Starši potrjechenych serbskich dźěći so wobaraja a su zhromadnje z čłonami Radworskeje staršiskeje iniciatiwy sakskemu kubłanskemu ministrej Christianej Piwarzej (CDU) list napisali. Podpisali su jón nimo staršich dalši podpěraćeljo, kotřiž su z Radworskej šulu zwjazani. Předewšěm dźe wšitkim wo to, serbskosć w Radworju zachować. Zakład za dalše wobstaće su serbskorěčne dźěći. Jelizo so serbska rjadowanja rozpušći, je tež pomjenowanje „serbska šula“ w Radworju wohrožene.