Łazkowčan Antonio Matik je 4. lěto swojeho studija mediciny na Lipšćanskej uniwersiće zakónčił. Milenka Rječcyna je so z nim rozmołwjała.

Sće so hižo rozsudźił, w kotrym wobłuku budźeće po studiju skutkować?

A. Matik: Wězo moje mysle do wěsteho směra du, doskónčnje rozsudźił pak so hišće njejsym. Sym nowym wliwam wotewrjeny a tuž so po wšelakich polach rozhladuju.

Na kotre wašnje so to stawa?

A. Matik: W běhu studiju so wšitke wobłuki mediciny wobjednawaja, hłowne z wučbu w chorowni a z kontaktom k pacientam. Lěkarjo su studentam po boku a posrědkuja trěbnu wědu za spjelnjenje nadawkow. Na te wašnje studenća swójske zajimy spóznaja. Dale tomu tež famulatury, kotrež sej wuzwolimy, přinošuja.

Što to poprawom je – famulatura?

A. Matik: Famulatura je wjacore měsacy trajacy praktikum, kotryž je w Němskej za studentow mediciny předpisany. Tón je trěbny za doskónčne přizwolenje, zo smědźa pozdźišo jako lěkarjo skutkować, za tak mjenowanu aprobaciju. Tež w Šwicarskej a Awstriskej je tutón praktikum předpisany.

Sće był w praksy dr. Stanija Nawki w Hamburgu. Kak je k tomu dóšło?