Mila Dźisławkec je so po maturje na aupair-lěto do Nižozemskeje podała. Kotry nadawki Dobrošičanka tam na starosći ma, chcyše Lisa-Maria Cyžec w rozmołwje z njej wědźeć.
Čehodla sy so za aupair-lěto w Nižozemskej rozsudźiła?
Po swojej maturje chcych najprjedy raz něšto druhe činić, prjedy hač ze studijom započnu. Chcych do wukraja, nowe nazhonjenja zběrać a z ludźimi dźěłać. Mějach na wuběr dźěłanje a pućowanje, socialne lěto abo aupair-lěto. Wosebje wabiło je mje hladajo na aupair- přebytk, zo sym w swójbje žiwa, wšědny dźeń we wukraju sobu dožiwjam a přiwšěm wěstu wěstotu mam. Prěnjotnje běch w Norwegskej, sym so pak tam po negatiwnym nazhonjenju z tamnišej swójbu za změnu swójby rozsudźiła. Sym jara wjesoła a tež tróšku horda na sebje, zo sym sej hišće raz zwěriła, tutón krok hić. Nětko sym w Nižozemskej a čuju so jara derje.
Kak sy so w hóstnej swójbje zažiwiła?
