Rakečanska gmejna ma masiwne pjenježne starosće. Na wčerawšim posedźenju gmejnskeje rady so samo hišće personelne přidružichu, dokelž njebě jasne, štó směł zhromadźiznu scyła nawjedować.
Rakecy (aha/SN). Wot wšeho spočatka bě wčerawše posedźenje Rakečanskeje gmejnskeje rady z wótrymi a často woprawnjenymi prašenjemi nakopjene. Swen Holger Nowotny (CDU), kotryž bu 12. apryla za noweho wjesnjanostu wuzwoleny, njeje hišće swoje zastojnstwo nastupił. Zastupowacy wjesnjanosta Gerd Schieber (Swobodne wolerske zjednoćenstwo) je so do předwidźaneho dowola podał. Tola wobzamknjeny posedźenski plan měješe so dodźeržeć, a tuž jeho dr. Andreas Weise zastupowaše. Radźićelka Annemarie Rentsch (Njestronscy wolerjo) měnješe, zo Weise – byrnjež najstarši radźićel był – nima prawo, zhromadźiznu gmejnskeje rady nawjedować. Skónčnje wón to tola sčini.
