W Kubšicach chcedźa parkowanišća za dojězdźowarjow wutworić

Kubšicy (CK/SN). Naměsto před Kubšiskim dwórnišćom smě gmejna kupić. Tomu su čłonojo gmejnskeje rady na swojim zašłym posedźenju jednohłósnje přihłosowali­. 1 400 kwadratnych metrow wulku ležownosć bě spočatnje jedna swójba při přesadźowanju kupiła. Gmejna pak je teren dale wobhospodariła a mjez druhim trawu sykła.

Hižo dlěši čas pak maja na wjesnym zelenišću problem z parkowacymi awtami, rozłoži gmejnski radźićel Jens Lehmann ­(Kubšiske wolerske zjednoćenstwo). Mnozy dojězdźowarjo, kotřiž z ćahom na dźěło jězdźa, tam swoje awta prěki a podłu parkuja. By-li gmejna płoninu kupiła, móhła so wona nastupajo par­kowanje wo porjad starać, radźićel wobkrući.

Hižo wjacekróć je tohorunja radźićel Ingo Löbert (Lěwica) na tónle problem skedźbnił. Po jeho měnjenju stej dźiwi wobchad a dźiwje parkowanje při dwórnišću strašnej za šulerjow, kotřiž při busowym zastanišću na bus čakaja. Na posedźenjach gmejnskeje rady je Löbert tuž časćišo napominał naležnosć rozrisać.