Mnohe dźakne słowa za spomóžne skutkowanje třoch fararjow
Njebjelčicy (SN/bl). Z Njebjelčanskeje wosady bu wčera farar Beno Jakubaš ze zabawu a bjesadu wot něhdźe třista wěriwych rozžohnowany. Hižo na dopołdnišej Božej mši so duchowny w prědowanju wosadnym za wšu dowěru a pomoc, kotruž bě minjene dźewjeć lět nazhonił, dźakowaše. Wjac hač 40 kemšerkow bě w swjedźenskej narodnej drasće – knjezej fararjej k česći. Po nyšporje přeprosy wón wšitkich wěriwych na wosadny swjedźeń do „Bjesady“. Z 25 štučkow wopřijacej basnju, kotruž spisa Mónika Hrjehorjowa ze Serbskich Pazlic, dźakowachu so dźěći za mnohe njezapomnite dožiwjenja. Tež šola, Helmut Ledźbor, cyrkwinski chór, młodźina, wosadna rada a Serbskopazličanske karnewalowe towarstwo z krótkim programom rozžohnowanske popołdnjo wobrubichu.