Nazyma je we Łužicy na mnohich městnach čas wułójenja rybow z hatow. Spočatk měsaca bě tomu w Bóšicach tak, minjeny kónc tydźenja w Klětnom. Tam hotuja so klětu na jubilej.
Klětno (JoS/SN). Słónčne wjedro je so w Klětnom wo to postarało, zo je so lětuši 24. rybarski swjedźeń při Maksimilianowym haće z wulkim wopytowarskim magnetom stał. Po starej tradiciji zahajichu tónle podawk ze zaćahom wšitkich wobdźělenych: Rychwałdskich muzikantow, rybarjow, nyksowki, wódneho muža a wězo nazhonitych rybarjow, kotřiž w swojich gumijowych cholowach hnydom do wody zalězechu, zo bychu prěni hoberski sak přihotowali.
Šef Klětnjanskeho rybarskeho předewzaća Dietmar Bergmann wopytowarjow witaše a přilubi, zo smědźa woni ke klětušemu jubilejnemu swjedźenjej z někotrymi překwapjenkami ličić. Tajke wšak mějachu tónraz tež přihotowane. Tak smědźachu dźěći z nyksowku Nicky a wódnym mužom Peterom I. po haće čołmikować. Hdyž rybarjo sak hromadźe ćehnjechu, bě kroma hata z njeličomnymi přihladowarjemi wobdata.