Swoju premjeru dožiwi wčera w Berlinskim kinje Lichtblick film z mjenom „Weißkohlraumschiff“ wo lońšej turneji serbskeje hudźbneje skupiny Berlinska dróha po Pólskej a Běłoruskej.

Berlin (ŠR/SN). Serbska folkpunk-skupina Berlinska dróha je wčera w Berlinje dokumentaciju wo swojej lońšej turneji po Pólskej a Běłoruskej předstajiła. Pask mjenowachu „Weißkohlraumschiff“, serbsce móhli jón pomjenować „Kosmiska łódź běłeho kału“. Režiser filma Robert Eckstein bě na prezentaciji přitomny, zo by na prašenja wot­mołwił. Po předstajenju da serbske hudźbne duwo unplugged-koncert.

Wobsadka kosmiskeje łódźe w filmje běchu pianistka a spěwarka skupiny Uta, husler Paul, manager Pijotrek a chronikar Robert. Šofer respektiwnje pilot bě najstarši a najnazhonićiši čłon cyłka z mjenom Łukasz. Reportaža wjedźe přihladowarjow z Berlina přez Pólsku dale do Běłoruskeje a je zdobom mjezy překročacy roadmovie. Myslimy-li na Běłorusku, je zdźěla ćežko so stereotypow wzdać. Pućowanska dokumentacija pak pokazuje, zo je kraj wjac hač poslednja diktatura w Europje.