Chrósćicy (ddy/SN). Minjeny pjatk swjećeše Chróšćanska wosadna młodźina swoju kermušku na Krawčikec žurli. Božu mšu z fararjom Michałom Andersom młodostni sobu wuhotowachu. Na to podachu so na žurlu, kotruž běchu Krawčikecy a wosadny młodźinski kružk rjenje wupyšili a hdźež bě wšitko trěbne spřihotowane. Wo hudźbu postara so kapała SerBeat. Wulce wotměnjawy repertoire sahaše wot diskofoksa přez polku hač k ludowym pěsnjam, při čimž runje tak serbske kaž tež němske a jendźelske šlagry zaklinčachu. Bjez dźiwa, zo bě rejwanišćo přeco derje pjelnjene. Mjez 250 wopytowarjemi knježeše tuž wulkotna nalada.