Šulerjo, wučerjo a starši wojuja wo swoju šulu „Handrij Zejler“
Wojerecy (AK/SN). Zakładna šula „Handrij Zejler“ Při Worjole we Wojerecach ma so jako wsy bliska šula z ćežišćom dwurěčnosće zdźeržeć. Za to zasadźeja so starši a wučerjo w swojim stejišću ke konceptej šulskeho wuwića města Wojerec. Stejišćo přewodźejo zapodachu woni peticiju k zachowanju šule městu a měšćanskej radźe. „Dotal smy 2 184 podpismow nazběrali“, wuzběhny Martina Jancyna, zastupowaca šulska wjednica, na posedźenju serbskeje přirady města Wojerec. „Starši chcedźa nas a naše kubłanišćo podpěrać, zo by so zachowało.“