Sulšecy (AR/SN). Wjesne kapałki w Kulowskich wsach słušeja hač na Spalowsku wšitke tamnišej katolskej wosadźe. Dwě z nich tuchwilu ponowjeja – Sulšečansku a Koćinsku. Hłownje zamołwity je sobustaw cyrkwinskeje rady Pětr Čórlich z Koćiny. Wón je so lětadołho prócował, zo bychu pjenježne přiražki wosady a biskopstwa za přewjedźenje trěbnych dźěłow přizwolene dóstali. Wjetšinu wudawkow pak darichu wobydlerjo wobeju wsow sami.
W Sulšecach stara so w nadawku wosady wjesny předstejićer Jurij Brösan wo koordinaciju dźěłow. Tu měješe so wosebje wonkowny wobmjetk ponowić. Wón njewotpowědowaše dotal pomnikoškitnym předpisam. Nimo toho ma so twar zwonka a znutřka wobarbić. Přewažny dźěl dźěłow, kotrež w přichodnych dnjach zakónča, wobstarachu we wuslědku wupisanjow twarske předewzaća z blišeje wokoliny. W Sulšecach přihotuja so z tym hižo na wosebity jubilej. Kapałka pochadźa mjenujcy z lěta 1716. Trěbny twarski material dari před 300 lětami tehdyši farar Lukaš Ławrjenc Jochomec z Peickwitz w Šleskej, pochadźacy z Němcow pola Kulowa.
