Za ponowjenje sportownje gmejna wobšěrnu analyzu zdźěłać dyrbjała
Worklecy (aha/SN). Předwidźane ponowjenje 1991 dotwarjeneje Worklečanskeje sportownje budźe něhdźe 1,1 milion eurow płaćić. Wo tym informowaše wjesnjanosta Franc Brusk (CDU) na srjedownym posedźenju gmejnskeje rady. Hala njewotpowěduje hižo płaćiwym wěstotnym žadanjam. Špundowanje je wusłužene; tež wobswětlenje, wokna, durje a sanitarne připrawy maja so ponowić. Tele a dalše naprawy su trěbne, zo by dalše wužiwanje sportownje na dlěši čas zaručene wostało.
