Sydarnja gratownje Ralbičanskeje wo- hnjoweje wobory bě sobotu połnje wobsadźena. Nawoda Achim Měrćink móžeše na hłownej zhromadźiznje wobory,­ kotrejž přisłuša 26 kameradow – mjez nimi dwě žonje –, tež wjesnja­nostu delanskeje gmejny Hubertusa Ryćerja (CDU) witać.

Ralbicy (aha/SN). Zhladujo na minjene lěto rozprawješe Měrćink wo kedźby­hódnych aktiwitach. Do cyłkownje 1 521 wukonjanych słužbnych hodźin słuša tež 16 wukubłanjow, kaž kwalifikacija 17 kameradow na wokrjesnej a nadregionalnej runinje a wobdźělenje na kursach krajneje woborneje šule. Jědnaće króć su wobornikow loni w nuzowych padach alarmowali, a to wosom króć k hašenju a trójce wulkeje wody a wobchadneho njezboža dla. Stajnje bě zasadźenska kmanosć ze znajmjeńša dźewjeć kame­radami zaručena. Mjeztym maja wšak w swojich rjadach tež třoch skupinskich nawodow a dweju z kmanosćemi, při hawarijach ćah nawjedować.