Hamor (AK/SN). Ćežke pjenježne połoženje ma Hamorska gmejna zmištrować. „Lětsa dyrbimy bjez powšitkownych klučowych připokazanjow Swobodneho stata Sakskeje wuńć“, rozłoži komornica Stefanie Arndt na wčerawšim posedźenju gmejnskeje rady hospodarski plan 2016. „Najwjetši problem je přemysłowy dawk. Ličimy drje z dochodami 1,7 milionow eurow. Runočasnje pak dyrbimy dwanaće milionow eurow wróćić, štož so wězo w etaće wotbłyšćuje.“ Z třomi napřećiwnymi hłosami radźićeljo lětuši etat schwalichu.

W zarjadniskim runje tak kaž w inwesticiskim wobłuku ma gmejna deficit po milionach. „Tajkile plan hišće ženje njemějachmy“, měnješe komornica. Komunu sobu najbóle poćežuje, zo dyrbi wot swojich dochodow z přemysłoweho dawka 920 000 eurow wotwjesć, dyrbi 2,3 miliony eurow wokrjesneho wotedawka płaćić a ma swobodnemu statej 3,2 milionaj eurow jako tak mjenowany wotedawk bohatych płaćić. Jedna z reakcijow na to je, zo spěchowanje towarstwam dospoł­nje šmórnu, hač na te, kotrež su w zrěčenjach zapisane.