Budyšin (SN). Z njeskutkom, kotryž bě so před nimale dwaceći lětami w Bukecach stał, zaběra so wot 24. meje Budyska wulka chłostanska komora Zhorjelskeho krajneho sudnistwa. Před njej dyrbi so 43lětny němski zamkar z Jabloneca ćežkeho rubježnistwa a rubjenja swobody dla zamołwić. Statne rěčnistwo jemu wumjetuje, zo bě 23. januara 1997 něhdźe w 7.30 hodź. hromadźe z hižo zasudźenym komplicu při zadnich durjach Bukečanskeje wotnožki wokrjesneje lutowarnje na přistajenu čakał. Wobaj jej z pistolu hrožeštaj, zo ma filialu wotamknyć. Nutřka wonaj žonu sputaštaj. Jako nawodnica wotnožki bórze na to přińdźe, jej wobskorženy z pistolu hrožeše a sej žadaše, zo ma trezor wočinić. Z njeho wza sej 60 000 hriwnow. Pjenjezy sej rubježnikaj pozdźišo dźěleštaj.