Gmejna chce trěbne naprawy hromadźe z agrarnym zawodom přewjesć
Miłoćicy (JK/SN). Wjetši zajim Miłočanow za bórzomne ponowjenje jich wjesneje dróhi bě wjesnjanosta Tomaš Čornak (CDU) na wčerawšim posedźenju Njebjelčanskeje gmejnskeje rady wočakował. Dokelž běchu jenož třo wobydlerjo přišli, chce gmejna wšitkich wjesnjanow hišće raz z wosebitym łopjenom informować, kak a hdy wjesnu dróhu ponowja. Na wupisanje gmejny bě so jenička firma přizjewiła, kotraž je hižo druhdźe dróhi ponowjała. Radźićeljo tuž wobzamknychu, nadawk přepodać předewzaću K. Riemer z Großenhaina. Wone bě poskitk pod kalkulowanej płaćiznu zapodało. Twarić budu w přichodnych štyrjoch tydźenjach.