Zhromadne stawnistwo z Malešecami hišće njepřizwolene

Wulka Dubrawa (CK/SN). Hač do kónca lěta wobmjezowane su Wulkodubrawscy gmejnscy radźićeljo na swojim zašłym posedźenju Gudrun Rodig za stawnicu powołali. Wona je takrjec zastupnica zastupjerki. Dotalna sobudźěłaćerka w tejle funkciji kónc septembra zarjadnistwo na swójske přeće wopušći. Zastupnistwo zdaše so najprjedy zaručene być, nětko pak trjebaja znowa narunanje. Na zakładźe zrěčenja z Malešanskej gmejnu so hižo něšto tydźenjow jedna z tamnišich třoch stawnicow wo naležnosće we Wulkej Dubrawje stara. Samodruhosće dla pak móže Aline Brötzmann tele dźěło jenož hač dosrjedź decembra wukonjeć. Tohodla ma tele nadawki nětko Gudrun Rodig, kotraž je poprawom hižo wot nalěća na wuměnku. Do toho bě wona stawnica w Rakecach.