Dźěl łužiskich wodźiznow je prawidłownje wobstražowany

Třinaće lět mjeztym je Józef Cwikowski w Porchowskej kupjeli wuchowanski płuwar. Nawuknył je to z Pólskeje pochadźacy w Halštrowskej wódnej straži. Tamnišemu towarstwu přisłuša tuchwilu wjace hač sto čłonow, mjez druhim tež z Chrósćic. Straža so wosebje wo to stara, zo by prawidłownje wuchowanskich płuwarjow wukubłała, kotřiž za to wotpowědny certifikat dóstanu. Naprašowanje za kursami je w Halštrowje dosć wulke, tak zo towarstwo po słowach Józefa Cwikowskeho z dorostom žane starosće nima. Mjez čłonami su tež dźěći, kotrež potom pozdźišo čestnohamtsce jako wuchowanscy płuwarjo skutkuja. Ći dźě su jara trěbni, w zjawnych kupjelach kaž tež při wodźiznach łužiskeje jězoriny.