16 000 ludźi online-peticiju přećiwo wobmjezowanju serbšćiny podpisało

Choćebuz (HA/SN). Do šěrokeje fronty, kotraž wobara so přećiwo předwidźanym špatnišim wuměnjenjam za wučbu serbšćiny na braniborskich šulach, je so wčera tohorunja měšćanska rada Choćebuza zarjadowała. Wšitcy čłonojo přihłosowachu wobzamknjenju, kotrež bě zapodał wyši měšćanosta Holger Kelch (CDU), podpěrany wot třoch wuběrkow. Te běchu so hižo do toho z tematiku roze­stajeli.

We wobzamknjenju napomina město Choćebuz braniborske ministerstwo za kubłanje, młodźinu a sport, swoje předewzaće cofnyć. Po planach ministerstwa měło přichodnje za wučbu serbšćiny w jednej skupinje znajmjeńša dwanaće wobdźělnikow być. To by na přikład jeno za město Choćebuz rěkało, zo je wučba serbšćiny na wšitkich sydom zakładnych a na jednej wyšej šuli wohrožena.