Wokrjes Budyšin přewozmje nošerstwo Malešanskeje wyšeje šule. To je wokrjesny sejmik wčera wobzamknył. Do wobzamknjenja přiwzate bu wudospołnjenje nastupajo perspektiwisku wučbu serbšćiny po koncepće 2plus.
Budyšin (SN/at). Wokrjesni radźićeljo su wčera znowa dopokazali, zo su serbskim naležnosćam napřećo wotewrjeni. Połnje přihłosowachu wot zarjadnistwa skonkretizowanemu mjezyfrakciskemu namjetej, kotryž běchu iniciator Dawid Statnik (SSWZ/Swobodni wolerjo), Hajko Kozel (Lěwica), Tomaš Čornak (CDU) a Roland Fleischer (SPD) zapodali.
