We wurisanju „Młodźina trenuje za olympiju“ wróćichu so koparki Serbskeho gymnazija Budyšin (SGB) ze zwjazkoweho finala w Berlinje ze 16. městnom. Wšitkim dźewjeć šulerkam 8. do 10. lětnika słuša wulke připóznaće za dotal najwuznamniši sportowy rezultat w stawiznach serbskeho kubłanišća.
Po sensacionelnym dobyću krajneho finala w kopańcy w meji tutoho lěta (SN wo tym rozprawjachu), poda so wosom holcow Budyskeho Serbskeho gymnazija a wrotarka Nele Pjetašec (nětko SWŠ „Michał Hórnik“ Worklecy) do Berlina, zo bychu z dalšimi 15 dobyćerjemi tamnych zwjazkowych krajow wo najlěpše zaměstnjenje wojowali. Na nich čakachu koparki sportowych gymnazijow abo elitowych šulow sporta, mnozy z nich hrajo w młodźinskej zwjazkowej lize Němskeje. Někotre wusahowace 16lětne šulerki honja nětko hižo w žónskich wyšoklasowych mustwach za bulom. Nimo toho steji za kóždy gymnazij w pozadku mócne koparske zjednoćenstwo, kotrež młodych talentow spěchuje.
