Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.

Do wobšěrneje infrastruktury w Pančicach-Kukowje słuša tankownja na kromje wsy. Runje tak kaž tamni přemysłownicy a rjemjeslnicy je tež wona wot wulkeho twarnišća za nowy móst nad Klóšterskej wodu potrjechena. Tankownja je jedna z třoch, kotrež wobhospodarja Liebenauska agrarna towaršnosć tankownjow. Kaž šef tankownjow Mario Berndt zdźěli, maja wot meje něhdźe třećinu mjenje wobrota. „Spočatnje běchmy z hišće wjetšim minusom ličili, ale tež tak je hižo zlě dosć.“