Prěni adwentny kónc tydźenja je w mnohich gmejnach kruty termin, zo tam adwentne wiki přewjeduja. Někotre­ z nich smy tule zestajeli, narok na dospołnosć pak přehlad nima.

Njeswačidło. 27. raz wotměja so jutře, sobotu, adwentne wiki w Njeswačidle. We wjesnym muzeju wotewru w 13 hodź. wosebitu hodownu wustajeńcu z historiskimi klankacymi domami kaž tež z małymi wobchodami. W Mildnerec pjekarni móža dźěći dopołdnja poprjančki pjec. Na žurli hosćenca poskića šulerjo zakładneje šule popołdnju dohodowny program. Wězo tež rumpodich wiki wopyta. Najwšelakoriše stejnišća poskića drohoćinki kaž tež jědź a napoje. Fa­rarka Susanne Aechtner budźe nawječor adwent­ny­ nyšpor swjećić, a pozawnowy chór ze swojimi dohodownymi štučkami lětuše wiki zakónči.