Njeswačidło (JK/SN). Jako je Njeswačanski wjesnjanosta Gerd Schuster (CDU) na poslednim lětušim posedźenju gmejnskeje rady wo předewzaćach 2018 w gmejnje rěčał, činješe to z jednym płakacym a jednym smějacym wóčkom. Dobre hospodarske połoženje w Němskej wjedźe tež w Njeswačanskej gmejnje k tomu, zo maja swójby zaso wjace dźěći. To wjesnjanostu wjeseli, hdyž so młode swójby w gmejnje derje čuja a ličba wobydlerjow přiběra.

Na tamnej stronje pak maja wšitke dźěći tež zastarane być. W tym nastupanju docpěja w Njeswačidle klětu swoje hranicy. Hižo nětko je pěstowarnja w nošerstwje Němskeho čerwjeneho křiža hač na poslednje městno wućežena. Něhdźe srjedź lěta, hdyž dźěći z pěstowarnje do šule du, so situacija něšto wolóži. Ale kónc lěta liča z wulkim nawalom. Přidatnje so wuměnjenja přiwótřa, hdyž nowy personalny kluč płaći. W tym wokomiku najpozdźišo budźetej dyrbjeć gmejna kaž tež nošer wo tym rozmyslować, hač popłatk zwyšitej.