Město planuje konferencu wo zhromadnosći Němcow a Serbow

Budyšin (CK/SN). „Mjeńšinowa politika je aktiwna wobydlerska politika. Wona spožča zhromadnosći móc, tež tendency wumjezowanja znjesć.“ To rjekny wčera Thede Boysen na posedźenju Budyskeje měšćanskeje rady. Hinak hač wumjezowanje su nazhonjenja wotmjezowanja wažne za wuwiće swójskeje identity. Tajke nazhonjenja su, kak so Němcy čuja, hdyž so wokoło nich něšto serbskeho stawa, abo nawopak, kak so Serbam z němskej dominancu dźe. „Dilema je, zo je mjeńšina na zrozumjenje wjetšiny pokazana“, wón rozłoži. Flensburgčan bě wjele lět nawoda mjeńšinoweho sekretariata w Berlinje a zastupowaše tam štyri narodne mjeńšiny Němskeje napřećo zwjazkowemu knježerstwu a zwjazkowemu sejmej.