Wjelelětny nawoda Kulowskeje wohnjoweje wobory Jurij Brösan je za čas swojeho skutkowanja wjele dožiwił. Nětko je swoje zastojnstwo do młódšich rukow přepodał.

Kulow (AK/SN). Hilbert Schultz z Kulowa je nowy nawoda wohnjoweje wobory za město Kulow a wokolne wsy. Jeho naměstnik je Thomas Werner. Wobeju je měšćanosta Markus Posch (CDU) na zašłym posedźenju měšćanskeje rady w Koćinje na pjeć lět do jeju zastojnstwow powołał. Runočasnje so wón wjelelětnemu nawodźe wobornikow Jurjej Brösanej za jeho skutkowanje dźakowaše.