Budyšin (SN/bn). Kónc tydźenja po swjatkach zarjaduje město 1 016. Budyske nalěćo. Wot 25. do 27. meje wuhotuje dohromady wjace hač 500 sobuskutkowacych na štyrjoch centralnych hrajnišćach kaž tež po nutřkownym měsće kulturny program. Nowe je jewišćo w saněrowanej rozwalinje Mnišeje cyrkwje na Wulkej Bratrowskej. Tam wustupitej mjez druhim Budyski chór Harmonija a młodźinski dujerski orchester wokrjesneje hudźb­neje šule, sobotu pokazaja tam film „Mamma Mia!“ Na Hłownym torhošću předstaja so kapała Jolly Jumper, spěwarjo, hudźbnicy a rejwarjo čěskeje folklorneje skupiny Šafrán, tribute-band Reck­less Roses a dalši. Na Mjasowych wikach zaklinča na přikład łaćonskoameriske zynki kapały Trio Milón, psychedeliski stoner-rock Drježdźanjanow Lasse Rein­strøm, spěwy serbskeho talenta Gabriela Momméra a čěske kaž tež serbske ludowe pěsnje ansambla Lidová muzika z Chrá­stu. Na Žitnych wikach pokaza Serbski ludowy ansambl swój pro­gram­ „Moja reja“, Horjany přeproša do toho na rańše piwko.